سلها سيف القدر والقرم حول عن حصانه
عظم الله اجر كل الاوفياء المخلصين
من رحل نبض القلوب الي غمر شعبه حنانه
مابقا للناس نبض ولا قلوب ولا حنين
عيب محزن والوطن يدفن جسد من عز شانه
عيب محزن والحزن لمفارق الفرسان دين
كيف مانحزن لسيف عز دين الله وصانه
كيف مانحزن لدرع من دروع المسلمين
كانه مانحزن لجابر من بنحزن عشانه
العيون الي مابكت لمفارقك تبكي لمين
ان رحل حاكم يجي مليون حاكم في مكانه
بس جابر لي رحل يرجع لنا جابر منين
يامنجي عزت الشعب الكويتي من هوانه
يامسجي فطرتك في نهج خير المرسلين
كل دمعه كفنتك ومابكت بعدك جبانه
كل عين ماشكت لغيبتك ماهي بعين
كان لك في كل درب احباب واصحاب وميانه
وكان لك في كل بيت انفاس وحساس وضنين
كنت صبح(ن) ماتعلمنا الفلاح الا عشانه
كنت صرح(ن) ماتزعزعك الرياح وماتلين
بنتصارك زادت امجاد العرب قدر ومكانه
من ديارك فاض خيرك للمخاليق اجمعين
مع قرارك ادرك التاريخ من يطلق عنانه
عقب نارك ولعت نار القهر بالطيبين
اسئلو دمع اليتامى عن معبته وحنانه
اسئلو التاريخ قبله كان وين وصار وين
اسئلو مجد الوطن عن عهد من وحد كيانه
اسئلو حزن البشر عن قصدت الخير الدفين
اسئلو عن طيبته عن هيبته عن عنفوانه
اسئلو عن فزعته في نصرت المستضعفين
كيف حاكم يسكن الدنيا ويعمل للديانه
يثبت انه خير امه اخرجت للعالمين
وشتكون الحكمه ان ماجات من منطق السانه
منهم الزهاد كانه ماهو من الزاهدين
وش يكون الاتزان بجنب عقله وتزانه
ويش هو الدين لو هذا الورع ماهو بدين
للوطن كنه وطن ولا جنانه هي جنانه
كل شي بالبلد ياشيخ مكسور وحزين
شعبك الي عاش فيك وعشت له بمنه وامانه
النهار الي جمع من وجهك الطاهر جبين
الرحيق الي زرعته في كفوف الزعفرانه
والغرام الي تركته في ضمايرنا ثجيل
والسماحه والمروه والحميه والفطانه
والكرامه والكرم واهل الوفا والمحسنين
باب قصرك مسجدك منبره ماذنته اذانه
المصلين الصلاه المؤمنات المؤمنين
كلهم من يوم ذاك القرم حول عن حصانه
والدموع تفلهم في كل وقت وكل حين
لي متى لين الشعوب تعرف فضله وامتنانه
لي متى لين السنين تروح من دون السنين
لي متى حتى نحس ان الفرح مثل الخيانه
لي متى حتى نزين حزن عمره ما يزين
لي ندفن بالمدامع حزن لايمكن دفانه
لين نغسل بالجروح آلام كل المسلمين
لين نثبت كيف كان بحبنا سيد زمانه
و كيف لما مات جابر مات مرفوع الجبين
كانه مانحزن لجابر من بنحزن عشانه
العيون ان مابكت لمفارقك تبكي لمين
الزعيم اليا رحل نلقا زعيم في مكانه
المصيبه لي رحل جابر يجي جابر منين
للشاعر حامد زيد